好多租客想提升居住安全或追求方便，想將原本嘅機械鎖換成電子鎖。但咁做會唔會違反租約？會唔會得罪業主？今日我哋同你拆解租客自行更換電子鎖嘅權利、限制同正確步驟，等你可以安心升級，同時避免糾紛。
在一張正常嘅租約，通常都會列明：「租客收到業主交來物業門匙及信箱鎖匙共X條，將來租客遷出時，必須交回業主，如有遺失，須照樣配妥，不得異議」。
重點：當中已經指出當退按金交吉時，門鎖需要恢復原狀，包括保留好成個舊鎖同所有鎖匙，如果唔係就可能被扣押金。擅自更換電子鎖而無法還原，有機會引致扣按金而做成財務損失。
由於機械鎖轉換電子鎖嘅客人佔咗電子鎖銷情好大部份，所以廠商喺設計電子鎖時，會將電子鎖嘅前後面板設計得比傳統機械鎖更大，目的是為咗安裝後門上唔會出現空隙，美觀且穩固。
但呢個設計同時帶嚟一個問題：安裝電子鎖時需要重新鑽孔（螺絲位、走線位），原有機械鎖嘅窿位未必能被覆蓋。日後想換返原本嘅機械鎖，鎖板就會遮唔住啲窿，導致門面損壞，無法「還原」。
雖然租約寫明，但好多租客為咗提升安全性同方便，願意自費更換電子鎖。最常見嘅誤解係：「我保留舊鎖，搬走時裝返舊鎖就還原到原來樣貌」。
但當準備交吉嗰陣先發現：舊鎖面板太細，未能覆蓋安裝電子鎖時開嘅新窿，無法恢復原狀，續而與業主發生爭執，甚至被扣減大額按金。千萬唔好等到最後一刻先諗還原問題。
一般共識中，將電子鎖還原成機械鎖但門上有窿，其實係好難接受嘅事。因此為避免爭執，安裝電子鎖前請先與業主取得共識。
可行方案：
➜ 留下電子鎖：完約交吉時將電子鎖留低，供下手租客/業主繼續使用，並白紙黑字寫喺租約附帶條款。
➜ 更換更大面板機械鎖：若業主唔接受電子鎖，你可以保證交吉時改用其他更大版面嘅機械鎖，確保遮蓋所有窿位，同時需得到業主書面同意。
➜ 簽署附加協議：列明安裝電子鎖後嘅還原責任，例如由你出錢搵師傅換回無窿門板或更換全新門，避免口同鼻拗。
租客更換電子鎖，最緊要「與業主主動溝通，取得共識」。如果你已經得到同意，想搵專業團隊安裝電子鎖，歡迎聯絡我哋101開鎖。我哋提供各類電子鎖安裝、上門評估、舊孔修補建議，確保你合法合規又安心。
我地可以幫你舊鎖拆除保留。安裝後測試，仲會教你日常使用同保養貼士。無論三星、Solity、Yale、Philips 各大品牌電子鎖，我哋都有豐富經驗。
